Sri Lakshmi Sahasranama stotram – śrī lakṣmī sahasranāma stōtram
śrī lakṣmī sahasranāma stōtraṁ
nāmnāṁ sāṣṭasahasrañca brūhi gārgya mahāmatē |
mahālakṣmyā mahādēvyā bhuktimuktyarthasiddhayē || 1 ||
gārgya uvāca-
sanatkumāramāsīnaṁ dvādaśādityasannibham |
apr̥cchanyōginō bhaktyā yōgināmarthasiddhayē || 2 ||
sarvalaukikakarmabhyō vimuktānāṁ hitāya vai |
bhuktimuktipradaṁ japyamanubrūhi dayānidhē || 3 ||
sanatkumāra bhagavansarvajñō:’si viśēṣataḥ |
āstikyasiddhayē nr̥̄ṇāṁ kṣipradharmārthasādhanam || 4 ||
khidyanti mānavāssarvē dhanābhāvēna kēvalam |
siddhyanti dhaninō:’nyasya naiva dharmārthakāmanāḥ || 5 ||
dāridryadhvaṁsinī nāma kēna vidyā prakīrtitā |
kēna vā brahmavidyā:’pi kēna mr̥tyuvināśinī || 6 ||
sarvāsāṁ sārabhūtaikā vidyānāṁ kēna kīrtitā |
pratyakṣasiddhidā brahman tāmācakṣva dayānidhē || 7 ||
sanatkumāra uvāca-
sādhu pr̥ṣṭaṁ mahābhāgāssarvalōkahitaiṣiṇaḥ |
mahatāmēṣa dharmaśca nānyēṣāmiti mē matiḥ || 8 ||
brahmaviṣṇumahādēvamahēndrādimahātmabhiḥ |
samprōktaṁ kathayāmyadya lakṣmīnāmasahasrakam || 9 ||
yasyōccāraṇamātrēṇa dāridryānmucyatē naraḥ |
kiṁ punastajjapājjāpī sarvēṣṭārthānavāpnuyāt || 10 ||
asya śrīlakṣmīdivyasahasranāmastōtramahāmantrasya ānandakardamaciklītēndirāsutādayō mahātmānō maharṣayaḥ anuṣṭupchandaḥ viṣṇumāyā śaktiḥ mahālakṣmīḥ parādēvatā śrīmahālakṣmīprasādadvārā sarvēṣṭārthasiddhyarthē japē viniyōgaḥ |
dhyānam-
padmanābhapriyāṁ dēvīṁ padmākṣīṁ padmavāsinīm |
padmavaktrāṁ padmahastāṁ vandē padmāmaharniśam || 1 ||
pūrṇēnduvadanāṁ divyaratnābharaṇabhūṣitām |
varadābhayahastāḍhyāṁ dhyāyēccandrasahōdarīm || 2 ||
icchārūpāṁ bhagavatassaccidānandarūpiṇīm |
sarvajñāṁ sarvajananīṁ viṣṇuvakṣassthalālayām |
dayālumaniśaṁ dhyāyētsukhasiddhisvarūpiṇīm || 3 ||
stōtram –
nityāgatānantanityā nandinī janarañjanī |
nityaprakāśinī caiva svaprakāśasvarūpiṇī || 1 ||
mahālakṣmīrmahākālī mahākanyā sarasvatī |
bhōgavaibhavasandhātrī bhaktānugrahakāriṇī || 2 ||
īśāvāsyā mahāmāyā mahādēvī mahēśvarī |
hr̥llēkhā paramā śaktirmātr̥kābījarūpiṇī || 3 ||
nityānandā nityabōdhā nādinī janamōdinī |
satyapratyayanī caiva svaprakāśātmarūpiṇī || 4 ||
tripurā bhairavī vidyā haṁsā vāgīśvarī śivā |
vāgdēvī ca mahārātriḥ kālarātristrilōcanā || 5 ||
bhadrakālī karālī ca mahākālī tilōttamā |
kālī karālavaktrāntā kāmākṣī kāmadā śubhā || 6 ||
caṇḍikā caṇḍarūpēśā cāmuṇḍā cakradhāriṇī |
trailōkyajayinī dēvī trailōkyavijayōttamā || 7 ||
siddhalakṣmīḥ kriyālakṣmīrmōkṣalakṣmīḥ prasādinī |
umā bhagavatī durgā cāndrī dākṣāyaṇī śivā || 8 ||
pratyaṅgirā dharāvēlā lōkamātā haripriyā |
pārvatī paramā dēvī brahmavidyāpradāyinī || 9 ||
arūpā bahurūpā ca virūpā viśvarūpiṇī |
pañcabhūtātmikā vāṇī pañcabhūtātmikā parā || 10 ||
kālī mā pañcikā vāgmī haviḥpratyadhidēvatā |
dēvamātā surēśānā dēvagarbhā:’mbikā dhr̥tiḥ || 11 ||
saṅkhyā jātiḥ kriyāśaktiḥ prakr̥tirmōhinī mahī |
yajñavidyā mahāvidyā guhyavidyā vibhāvarī || 12 ||
jyōtiṣmatī mahāmātā sarvamantraphalapradā |
dāridryadhvaṁsinī dēvī hr̥dayagranthibhēdinī || 13 ||
sahasrādityasaṅkāśā candrikā candrarūpiṇī |
gāyatrī sōmasambhūtissāvitrī praṇavātmikā || 14 ||
śāṅkarī vaiṣṇavī brāhmī sarvadēvanamaskr̥tā |
sēvyadurgā kubērākṣī karavīranivāsinī || 15 ||
jayā ca vijayā caiva jayantī cā:’parājitā |
kubjikā kālikā śāstrī vīṇāpustakadhāriṇī || 16 ||
sarvajñaśaktiśśrīśaktirbrahmaviṣṇuśivātmikā |
iḍāpiṅgalikāmadhyamr̥ṇālītanturūpiṇī || 17 ||
yajñēśānī prathā dīkṣā dakṣiṇā sarvamōhinī |
aṣṭāṅgayōginī dēvī nirbījadhyānagōcarā || 18 ||
sarvatīrthasthitā śuddhā sarvaparvatavāsinī |
vēdaśāstraprabhā dēvī ṣaḍaṅgādipadakramā || 19 ||
śivā dhātrī śubhānandā yajñakarmasvarūpiṇī |
vratinī mēnakā dēvī brahmāṇī brahmacāriṇī || 20 ||
ēkākṣaraparā tārā bhavabandhavināśinī |
viśvambharā dharādhārā nirādhārā:’dhikasvarā || 21 ||
rākā kuhūramāvāsyā pūrṇimā:’numatirdyutiḥ |
sinīvālī śivā:’vaśyā vaiśvadēvī piśaṅgilā || 22 ||
pippalā ca viśālākṣī rakṣōghnī vr̥ṣṭikāriṇī |
duṣṭavidrāviṇī dēvī sarvōpadravanāśinī || 23 ||
śāradā śarasandhānā sarvaśastrasvarūpiṇī |
yuddhamadhyasthitā dēvī sarvabhūtaprabhañjanī || 24 ||
ayuddhā yuddharūpā ca śāntā śāntisvarūpiṇī |
gaṅgā sarasvatīvēṇīyamunānarmadāpagā || 25 ||
samudravasanāvāsā brahmāṇḍaśrōṇimēkhalā |
pañcavaktrā daśabhujā śuddhasphaṭikasannibhā || 26 ||
raktā kr̥ṣṇā sitā pītā sarvavarṇā nirīśvarī |
kālikā cakrikā dēvī satyā tu vaṭukāsthitā || 27 ||
taruṇī vāruṇī nārī jyēṣṭhādēvī surēśvarī |
viśvambharādharā kartrī galārgalavibhañjanī || 28 ||
sandhyārātrirdivājyōtsnā kalākāṣṭhā nimēṣikā |
urvī kātyāyanī śubhrā saṁsārārṇavatāriṇī || 29 ||
kapilā kīlikā:’śōkā mallikānavamallikā | [** mallikānavamālikā **]
dēvikā nandikā śāntā bhañjikā bhayabhañjikā || 30 ||
kauśikī vaidikī dēvī saurī rūpādhikā:’tibhā |
digvastrā navavastrā ca kanyakā kamalōdbhavā || 31 ||
śrīssaumyalakṣaṇā:’tītadurgā sūtraprabōdhikā |
śraddhā mēdhā kr̥tiḥ prajñā dhāraṇā kāntirēva ca || 32 ||
śrutiḥ smr̥tirdhr̥tirdhanyā bhūtiriṣṭirmanīṣiṇī |
viraktirvyāpinī māyā sarvamāyāprabhañjanī || 33 ||
māhēndrī mantriṇī siṁhī cēndrajālasvarūpiṇī |
avasthātrayanirmuktā guṇatrayavivarjitā || 34 ||
īṣaṇātrayanirmuktā sarvarōgavivarjitā |
yōgidhyānāntagamyā ca yōgadhyānaparāyaṇā || 35 ||
trayīśikhā viśēṣajñā vēdāntajñānarūpiṇī |
bhāratī kamalā bhāṣā padmā padmavatī kr̥tiḥ || 36 ||
gautamī gōmatī gaurī īśānā haṁsavāhinī |
nārāyaṇī prabhādhārā jāhnavī śaṅkarātmajā || 37 ||
citraghaṇṭā sunandā śrīrmānavī manusambhavā |
stambhinī kṣōbhiṇī mārī bhrāmiṇī śatrumāriṇī || 38 ||
mōhinī dvēṣiṇī vīrā aghōrā rudrarūpiṇī |
rudraikādaśinī puṇyā kalyāṇī lābhakāriṇī || 39 ||
dēvadurgā mahādurgā svapnadurgā:’ṣṭabhairavī |
sūryacandrāgnirūpā ca grahanakṣatrarūpiṇī || 40 ||
bindunādakalātītā bindunādakalātmikā |
daśavāyujayākārā kalāṣōḍaśasamyutā || 41 ||
kāśyapī kamalādēvī nādacakranivāsinī |
mr̥ḍādhārā sthirā guhyā dēvikā cakrarūpiṇī || 42 ||
avidyā śārvarī bhuñjā jambhāsuranibarhiṇī |
śrīkāyā śrīkalā śubhrā karmanirmūlakāriṇī || 43 ||
ādilakṣmīrguṇādhārā pañcabrahmātmikā parā |
śrutirbrahmamukhāvāsā sarvasampattirūpiṇī || 44 ||
mr̥tasañjīvanī maitrī kāminī kāmavarjitā |
nirvāṇamārgadā dēvī haṁsinī kāśikā kṣamā || 45 ||
saparyā guṇinī bhinnā nirguṇā khaṇḍitāśubhā |
svāminī vēdinī śakyā śāmbarī cakradhāriṇī || 46 ||
daṇḍinī muṇḍinī vyāghrī śikhinī sōmasaṁhatiḥ |
cintāmaṇiścidānandā pañcabāṇaprabōdhinī || 47 ||
bāṇaśrēṇissahasrākṣī sahasrabhujapādukā |
sandhyāvalistrisandhyākhyā brahmāṇḍamaṇibhūṣaṇā || 48 ||
vāsavī vāruṇīsēnā kulikā mantrarañjanī |
jitaprāṇasvarūpā ca kāntā kāmyavarapradā || 49 ||
mantrabrāhmaṇavidyārthā nādarūpā haviṣmatī |
ātharvaṇiḥ śrutiḥ śūnyā kalpanāvarjitā satī || 50 ||
sattājātiḥ pramā:’mēyā:’pramitiḥ prāṇadā gatiḥ |
avarṇā pañcavarṇā ca sarvadā bhuvanēśvarī || 51 ||
trailōkyamōhinī vidyā sarvabhartrī kṣarā:’kṣarā |
hiraṇyavarṇā hariṇī sarvōpadravanāśinī || 52 ||
kaivalyapadavīrēkhā sūryamaṇḍalasaṁsthitā |
sōmamaṇḍalamadhyasthā vahnimaṇḍalasaṁsthitā || 53 ||
vāyumaṇḍalamadhyasthā vyōmamaṇḍalasaṁsthitā |
cakrikā cakramadhyasthā cakramārgapravartinī || 54 ||
kōkilākulacakrēśā pakṣatiḥ paṅktipāvanī |
sarvasiddhāntamārgasthā ṣaḍvarṇāvaravarjitā || 55 ||
śararudraharā hantrī sarvasaṁhārakāriṇī |
puruṣā pauruṣī tuṣṭissarvatantraprasūtikā || 56 ||
ardhanārīśvarī dēvī sarvavidyāpradāyinī |
bhārgavī yājuṣīvidyā sarvōpaniṣadāsthitā || 57 || [** bhujuṣīvidyā **]
vyōmakēśākhilaprāṇā pañcakōśavilakṣaṇā |
pañcakōśātmikā pratyakpañcabrahmātmikā śivā || 58 ||
jagajjarājanitrī ca pañcakarmaprasūtikā |
vāgdēvyābharaṇākārā sarvakāmyasthitāsthitiḥ || 59 ||
aṣṭādaśacatuṣṣaṣṭhipīṭhikā vidyayā yutā |
kālikākarṣaṇaśyāmā yakṣiṇī kinnarēśvarī || 60 ||
kētakī mallikā:’śōkā vārāhī dharaṇī dhruvā |
nārasiṁhī mahōgrāsyā bhaktānāmārtināśinī || 61 ||
antarbalā sthirā lakṣmīrjarāmaraṇanāśinī |
śrīrañjitā mahākāyā sōmasūryāgnilōcanā || 62 ||
aditirdēvamātā ca aṣṭaputrā:’ṣṭayōginī |
aṣṭaprakr̥tiraṣṭāṣṭavibhrājadvikr̥tākr̥tiḥ || 63 ||
durbhikṣadhvaṁsinī dēvī sītā satyā ca rukmiṇī |
khyātijā bhārgavī dēvī dēvayōnistapasvinī || 64 ||
śākambharī mahāśōṇā garuḍōparisaṁsthitā |
siṁhagā vyāghragā dēvī vāyugā ca mahādrigā || 65 ||
akārādikṣakārāntā sarvavidyādhidēvatā |
mantravyākhyānanipuṇā jyōtiśśāstraikalōcanā || 66 ||
iḍāpiṅgalikāmadhyāsuṣumnā granthibhēdinī |
kālacakrāśrayōpētā kālacakrasvarūpiṇī || 67 ||
vaiśāradī matiśśrēṣṭhā variṣṭhā sarvadīpikā |
vaināyakī varārōhā śrōṇivēlā bahirvaliḥ || 68 ||
jambhinī jr̥mbhiṇī jambhakāriṇī gaṇakārikā |
śaraṇī cakrikā:’nantā sarvavyādhicikitsakī || 69 ||
dēvakī dēvasaṅkāśā vāridhiḥ karuṇākarā |
śarvarī sarvasampannā sarvapāpaprabhañjanī || 70 ||
ēkamātrā dvimātrā ca trimātrā ca tathā:’parā |
ardhamātrā parā sūkṣmā sūkṣmārthā:’rthaparā:’parā || 71 ||
ēkavīrā viśēṣākhyā ṣaṣṭhīdēvī manasvinī |
naiṣkarmyā niṣkalālōkā jñānakarmādhikā guṇā || 72 ||
sabandhvānandasandōhā vyōmākārā:’nirūpitā |
gadyapadyātmikā vāṇī sarvālaṅkārasamyutā || 73 ||
sādhubandhapadanyāsā sarvaukō ghaṭikāvaliḥ |
ṣaṭkarmā karkaśākārā sarvakarmavivarjitā || 74 ||
ādityavarṇā cāparṇā kāminī vararūpiṇī |
brahmāṇī brahmasantānā vēdavāgīśvarī śivā || 75 ||
purāṇanyāyamīmāṁsādharmaśāstrāgamaśrutā |
sadyōvēdavatī sarvā haṁsī vidyādhidēvatā || 76 ||
viśvēśvarī jagaddhātrī viśvanirmāṇakāriṇī |
vaidikī vēdarūpā ca kālikā kālarūpiṇī || 77 ||
nārāyaṇī mahādēvī sarvatattvapravartinī |
hiraṇyavarṇarūpā ca hiraṇyapadasambhavā || 78 ||
kaivalyapadavī puṇyā kaivalyajñānalakṣitā |
brahmasampattirūpā ca brahmasampattikāriṇī || 79 ||
vāruṇī vāruṇārādhyā sarvakarmapravartinī |
ēkākṣaraparā:’:’yuktā sarvadāridryabhañjinī || 80 ||
pāśāṅkuśānvitā divyā vīṇāvyākhyākṣasūtrabhr̥t |
ēkamūrtistrayīmūrtirmadhukaiṭabhabhañjinī || 81 ||
sāṅkhyā sāṅkhyavatī jvālā jvalantī kāmarūpiṇī |
jāgratī sarvasampattissuṣuptā svēṣṭadāyinī || 82 ||
kapālinī mahādamṣṭrā bhrukuṭī kuṭilānanā |
sarvāvāsā suvāsā ca br̥hatyaṣṭiśca śakvarī || 83 ||
chandōgaṇapratiṣṭhā ca kalmāṣī karuṇātmikā |
cakṣuṣmatī mahāghōṣā khaḍgacarmadharā:’śaniḥ || 84 ||
śilpavaicitryavidyōtā sarvatōbhadravāsinī |
acintyalakṣaṇākārā sūtrabhāṣyanibandhanā || 85 ||
sarvavēdārthasampattissarvaśāstrārthamātr̥kā |
akārādikṣakārāntasarvavarṇakr̥tasthalā || 86 ||
sarvalakṣmīssadānandā sāravidyā sadāśivā |
sarvajñā sarvaśaktiśca khēcarīrūpagōcchritā || 87 ||
aṇimādiguṇōpētā parā kāṣṭhā parā gatiḥ |
haṁsayuktavimānasthā haṁsārūḍhā śaśiprabhā || 88 ||
bhavānī vāsanāśaktirākr̥tisthākhilā:’khilā |
tantrahēturvicitrāṅgī vyōmagaṅgāvinōdinī || 89 ||
varṣā ca vārṣikā caiva r̥gyajussāmarūpiṇī |
mahānadīnadīpuṇyā:’gaṇyapuṇyaguṇakriyā || 90 ||
samādhigatalabhyārthā śrōtavyā svapriyā ghr̥ṇā |
nāmākṣaraparā dēvī upasarganakhāñcitā || 91 ||
nipātōrudvayījaṅghā mātr̥kā mantrarūpiṇī |
āsīnā ca śayānā ca tiṣṭhantī dhāvanādhikā || 92 ||
lakṣyalakṣaṇayōgāḍhyā tādrūpyagaṇanākr̥tiḥ |
saikarūpā naikarūpā sēndurūpā tadākr̥tiḥ || 93 ||
samāsataddhitākārā vibhaktivacanātmikā |
svāhākārā svadhākārā śrīpatyardhāṅganandinī || 94 ||
gambhīrā gahanā guhyā yōniliṅgārdhadhāriṇī |
śēṣavāsukisaṁsēvyā capalā varavarṇinī || 95 ||
kāruṇyākārasampattiḥ kīlakr̥nmantrakīlikā |
śaktibījātmikā sarvamantrēṣṭākṣayakāmanā || 96 ||
āgnēyī pārthivā āpyā vāyavyā vyōmakētanā |
satyajñānātmikā:’:’nandā brāhmī brahma sanātanī || 97 ||
avidyāvāsanā māyāprakr̥tissarvamōhinī |
śaktirdhāraṇaśaktiśca cidacicchaktiyōginī || 98 ||
vaktrāruṇā mahāmāyā marīcirmadamardinī |
virāṭ svāhā svadhā śuddhā nīrūpāstissubhaktigā || 99 ||
nirūpitādvayīvidyā nityānityasvarūpiṇī |
vairājamārgasañcārā sarvasatpathadarśinī || 100 ||
jālandharī mr̥ḍānī ca bhavānī bhavabhañjanī |
traikālikajñānatantustrikālajñānadāyinī || 101 ||
nādātītā smr̥tiḥ prajñā dhātrīrūpā tripuṣkarā |
parājitāvidhānajñā viśēṣitaguṇātmikā || 102 ||
hiraṇyakēśinī hēmabrahmasūtravicakṣaṇā |
asaṅkhyēyaparārdhāntasvaravyañjanavaikharī || 103 ||
madhujihvā madhumatī madhumāsōdayā madhuḥ |
mādhavī ca mahābhāgā mēghagambhīranisvanā || 104 ||
brahmaviṣṇumahēśādijñātavyārthaviśēṣagā |
nābhau vahniśikhākārā lalāṭē candrasannibhā || 105 ||
bhrūmadhyē bhāskarākārā sarvatārākr̥tirhr̥di |
kr̥ttikādibharaṇyantanakṣatrēṣṭyārcitōdayā || 106 ||
grahavidyātmikā jyōtirjyōtirvinmatijīvikā |
brahmāṇḍagarbhiṇī bālā saptāvaraṇadēvatā || 107 ||
vairājōttamasāmrājyā kumārakuśalōdayā |
bagalā bhramarāmbā ca śivadūtī śivātmikā || 108 ||
mēruvindhyādisaṁsthānā kāśmīrapuravāsinī |
yōganidrā mahānidrā vinidrā rākṣasāśritā || 109 ||
suvarṇadā mahāgaṅgā pañcākhyā pañcasaṁhatiḥ |
suprajātā suvīrā ca supōṣā supatiśśivā || 110 ||
sugr̥hā raktabījāntā hatakandarpajīvikā |
samudravyōmamadhyasthā samabindusamāśrayā || 111 ||
saubhāgyarasajīvātussārāsāravivēkadr̥k |
trivalyādisupuṣṭāṅgā bhāratī bharatāśritā || 112 ||
nādabrahmamayīvidyā jñānabrahmamayīparā |
brahmanāḍī niruktiśca brahmakaivalyasādhanam || 113 ||
kālikēyamahōdāravīryavikramarūpiṇī |
vaḍavāgniśikhāvaktrā mahākavalatarpaṇā || 114 ||
mahābhūtā mahādarpā mahāsārā mahākratuḥ |
pañjabhūtamahāgrāsā pañcabhūtādhidēvatā || 115 ||
sarvapramāṇā sampattissarvarōgapratikriyā |
brahmāṇḍāntarbahirvyāptā viṣṇuvakṣōvibhūṣiṇī || 116 ||
śāṅkarī vidhivaktrasthā pravarā varahētukī |
hēmamālā śikhāmālā triśikhā pañcalōcanā || 117 || [** pañcamōcanā **]
sarvāgamasadācāramaryādā yātubhañjanī |
puṇyaślōkaprabandhāḍhyā sarvāntaryāmirūpiṇī || 118 ||
sāmagānasamārādhyā śrōtrakarṇarasāyanam |
jīvalōkaikajīvāturbhadrōdāravilōkanā || 119 ||
taṭitkōṭilasatkāntistaruṇī harisundarī |
mīnanētrā ca sēndrākṣī viśālākṣī sumaṅgalā || 120 ||
sarvamaṅgalasampannā sākṣānmaṅgaladēvatā |
dēhahr̥ddīpikā dīptirjihvapāpapraṇāśinī || 121 ||
ardhacandrōllasaddamṣṭrā yajñavāṭīvilāsinī |
mahādurgā mahōtsāhā mahādēvabalōdayā || 122 ||
ḍākinīḍyā śākinīḍyā sākinīḍyā samastajuṭ |
niraṅkuśā nākivandyā ṣaḍādhārādhidēvatā || 123 ||
bhuvanajñāniniśśrēṇī bhuvanākāravallarī |
śāśvatī śāśvatākārā lōkānugrahakāriṇī || 124 ||
sārasī mānasī haṁsī haṁsalōkapradāyinī |
cinmudrālaṅkr̥takarā kōṭisūryasamaprabhā || 125 ||
sukhaprāṇiśirōrēkhā sadadr̥ṣṭapradāyinī |
sarvasāṅkaryadōṣaghnī grahōpadravanāśinī || 126 ||
kṣudrajantubhayaghnī ca viṣarōgādibhañjanī |
sadāśāntā sadāśuddhā gr̥hacchidranivāriṇī || 127 ||
kalidōṣapraśamanī kōlāhalapurasthitā |
gaurī lākṣaṇikī mukhyā jaghanyākr̥tivarjitā || 128 ||
māyā vidyā mūlabhūtā vāsavī viṣṇucētanā |
vādinī vasurūpā ca vasuratnaparicchadā || 129 ||
chāndasī candrahr̥dayā mantrasvacchandabhairavī |
vanamālā vaijayantī pañcadivyāyudhātmikā || 130 ||
pītāmbaramayī cañcatkaustubhā harikāminī |
nityā tathyā ramā rāmā ramaṇī mr̥tyubhañjanī || 131 ||
jyēṣṭhā kāṣṭhā dhaniṣṭhāntā śarāṅgī nirguṇapriyā |
maitrēyā mitravindā ca śēṣyaśēṣakalāśayā || 132 ||
vārāṇasīvāsalabhyā cāryāvartajanastutā | [** vārāṇasīvāsaratā **]
jagadutpattisaṁsthānasaṁhāratrayakāraṇam || 133 ||
tvamamba viṣṇusarvasvaṁ namastē:’stu mahēśvari |
namastē sarvalōkānāṁ jananyai puṇyamūrtayē || 134 ||
siddhalakṣmīrmahākāli mahalakṣmi namō:’stu tē |
sadyōjātādipañcāgnirūpā pañcakapañcakam || 135 ||
yantralakṣmīrbhavatyādirādyādyē tē namō namaḥ |
sr̥ṣṭyādikāraṇākāravitatē dōṣavarjitē || 136 ||
jagallakṣmīrjaganmātarviṣṇupatni namō:’stu tē |
navakōṭimahāśaktisamupāsyapadāmbujē || 137 ||
kanatsauvarṇaratnāḍhya sarvābharaṇabhūṣitē |
anantānityamahiṣīprapañcēśvaranāyaki || 138 ||
atyucchritapadāntasthē paramavyōmanāyaki |
nākapr̥ṣṭhagatārādhyē viṣṇulōkavilāsini || 139 ||
vaikuṇṭharājamahiṣi śrīraṅganagarāśritē |
raṅganāyaki bhūputri kr̥ṣṇē varadavallabhē || 140 ||
kōṭibrahmādisaṁsēvyē kōṭirudrādikīrtitē |
mātuluṅgamayaṁ khēṭaṁ sauvarṇacaṣakaṁ tathā || 141 ||
padmadvayaṁ pūrṇakumbhaṁ kīrañca varadābhayē |
pāśamaṅkuśakaṁ śaṅkhaṁ cakraṁ śūlaṁ kr̥pāṇikām || 142 ||
dhanurbāṇau cākṣamālāṁ cinmudrāmapi bibhratī |
aṣṭādaśabhujē lakṣmīrmahāṣṭādaśapīṭhagē || 143 ||
bhūminīlādisaṁsēvyē svāmicittānuvartini |
padmē padmālayē padmi pūrṇakumbhābhiṣēcitē || 144 ||
indirēndindirābhākṣi kṣīrasāgarakanyakē |
bhārgavi tvaṁ svatantrēcchā vaśīkr̥tajagatpatiḥ || 145 ||
maṅgalaṁ maṅgalānāṁ tvaṁ dēvatānāṁ ca dēvatā |
tvamuttamōttamānāṁ ca tvaṁ śrēyaḥ paramāmr̥tam || 146 ||
dhanadhānyābhivr̥ddhiśca sārvabhaumasukhōcchrayā |
āndōlikādisaubhāgyaṁ mattēbhādimahōdayaḥ || 147 ||
putrapautrābhivr̥ddhiśca vidyābhōgabalādikam |
āyurārōgyasampattiraṣṭaiśvaryaṁ tvamēva hi || 148 ||
paramēśavibhūtiśca sūkṣmātsūkṣmatarāgatiḥ |
sadayāpāṅgasandattabrahmēndrādipadasthitiḥ || 149 ||
avyāhatamahābhāgyaṁ tvamēvākṣōbhyavikramaḥ |
samanvayaśca vēdānāmavirōdhastvamēva hi || 150 ||
niḥśrēyasapadaprāptisādhanaṁ phalamēva ca |
śrīmantrarājarājñī ca śrīvidyā kṣēmakāriṇī || 151 ||
śrīmbījajapasantuṣṭā aiṁ hrīṁ śrīṁ bījapālikā |
prapattimārgasulabhā viṣṇuprathamakiṅkarī || 152 ||
klīṅkārārthasavitrī ca saumaṅgalyādhidēvatā |
śrīṣōḍaśākṣarīvidyā śrīyantrapuravāsinī || 153 ||
sarvamaṅgalamāṅgalyē śivē sarvārthasādhikē |
śaraṇyē tryambakē gaurī nārāyaṇi namō:’stu tē || 154 ||
punaḥ punarnamastē:’stu sāṣṭāṅgamayutaṁ punaḥ |
sanatkumāra uvāca-
ēvaṁ stutā mahālakṣmīrbrahmarudrādibhissuraiḥ |
namadbhirārtairdīnaiśca nissvatvairbhōgavarjitaiḥ || 1 ||
jyēṣṭhā juṣṭaiśca niśśrīkaissaṁsārātsvaparāyaṇaiḥ |
viṣṇupatnī dadau tēṣāṁ darśanaṁ dr̥ṣṭitarpaṇam || 2 ||
śaratpūrṇēndukōṭyābhadhavalāpāṅgavīkṣaṇaiḥ |
sarvānsattvasamāviṣṭān cakrē hr̥ṣṭā varaṁ dadau || 3 ||
mahālakṣmīruvāca-
nāmnāṁ sāṣṭasahasraṁ mē pramādādvāpi yassakr̥t |
kīrtayēttatkulē satyaṁ vasāmyācandratārakam || 4 ||
kiṁ punarniyamājjapturmadēkaśaraṇasya ca |
mātr̥vatsānukampāhaṁ pōṣakī syāmaharniśam || 5 ||
mannāma stavatāṁ lōkē durlabhaṁ nāsti cintitam |
matprasādēna sarvē:’pi svasvēṣṭārthamavāpsyatha || 6 ||
luptavaiṣṇavadharmasya madvratēṣvavakīrṇinaḥ |
bhaktiprapattihīnasya vandyō nāmnāṁ stavō:’pi mē || 7 ||
tasmādavaśyaṁ tairdōṣairvihīnaḥ pāpavarjitaḥ |
japētsāṣṭasahasraṁ mē nāmnāṁ pratyahamādarāt || 8 ||
sākṣādalakṣmīputrō:’pi durbhāgyō:’pyalasō:’pi vā |
aprayatnō:’pi mūḍhō:’pi vikalaḥ patitō:’pi ca || 9 ||
avaśyaṁ prāpnuyādbhāgyaṁ matprasādēna kēvalam |
spr̥hēyamacirāddēvā varadānāya jāpinaḥ |
dadāmi sarvamiṣṭārthaṁ lakṣmīti smaratāṁ dhruvam || 10 ||
sanatkumāra uvāca-
ityuktvā:’ntardadhē lakṣmīrvaiṣṇavī bhagavatkalā |
iṣṭāpūrtaṁ ca sukr̥taṁ bhāgadhēyaṁ ca cintitam || 11 ||
svaṁ svaṁ sthānaṁ ca bhōgaṁ ca vijayaṁ lēbhirē surāḥ |
tadētat pravadāmyadya lakṣmīnāmasahasrakam |
yōginaḥ paṭhata kṣipraṁ cintitārthānavāpsyatha || 12 ||
gārgya uvāca-
sanatkumārōyōgīndra ityuktvā sa dayānidhiḥ |
anugr̥hya yayau kṣipraṁ tāṁśca dvādaśayōginaḥ || 13 ||
tasmādētadrahasyaṁ ca gōpyaṁ japyaṁ prayatnataḥ |
aṣṭamyāṁ ca caturdaśyāṁ navamyāṁ bhr̥guvāsarē || 14 ||
paurṇamāsyāmamāyāṁ ca parvakālē viśēṣataḥ |
japēdvā nityakāryēṣu sarvānkāmānavāpnuyāt || 15 ||
iti śrīskandapurāṇē sanatkumārasaṁhitāyāṁ lakṣmīsahasranāmastōtraṁ sampūrṇam ||
No comments:
Post a Comment